Podemos Vigo denuncia a criminalización da solidariedade co pobo palestino

Unha morea de militantes de Podemos Vigo participamos este 20 de maio na concentración en apoio ás oito activistas pro-palestinas xulgadas por unha acción de boicot a produtos israelís en Vigo. Denunciamos a represión e o uso da Lei Mordaza como ferramenta para acalar a protesta e a solidariedade internacionalista coa causa palestina.

Unha ampla representación de militantes de Podemos Vigo participamos este 20 de maio na concentración en apoio ás oito activistas pro-palestinos xulgados por realizar unha acción simbólica de boicot a produtos israelís no supermercado Carrefour da nosa cidade. Esta acción, encadrada na campaña internacional BDS (Boicot, Desinvestimentos e Sancións), buscaba visibilizar a complicidade de grandes empresas multinacionais como Carrefour no financiamento do apartheid, a ocupación e o xenocidio que perpetra o estado sionista de Israel sobre o pobo palestino.

Desde Podemos Vigo, denunciamos con firmeza a represión política e xudicial que están a sufrir estas compañeiras, acusadas por exercer o seu lexítimo dereito á protesta pacífica. A resposta policial e xurídica evidencia unha estratexia sistemática de criminalización do activismo social e internacionalista, coa Lei Mordaza como ferramenta para acalar as voces disidentes e solidarias co pobo palestino.

A liberdade de expresión e o dereito á protesta pacífica son piares fundamentais de calquera sociedade democrática. Cando se reprime a denuncia do xenocidio en Gaza e se xulga a quen se mobiliza contra a impunidade de Israel, estamos ante unha deriva autoritaria que non podemos permitir.

Resulta especialmente grave que se persiga penalmente unha acción simbólica que denuncia unha realidade silenciada polos grandes medios e protexida polos intereses económicos e xeopolíticos da Unión Europea e do Estado español. Mentres empresas como Carrefour continúan comerciando con produtos procedentes de asentamentos ilegais ou fabricados baixo condicións de apartheid, activistas que defenden os dereitos humanos son levadas a xuízo.

Durante o xuízo, foron moitas as voces que se fixeron oír ás portas da Cidade da Xustiza de Vigo. Berros como “Boicot a Israel” e “Palestina vencerá” resoaron como expresión dunha solidariedade que non se vai calar nin intimidar.

Desde Podemos Vigo reafirmamos o noso compromiso co movemento BDS e coa loita polos dereitos do pobo palestino. Defenderemos sempre o dereito á desobediencia civil, á protesta pacífica e á liberdade de expresión fronte a un sistema que pretende converter en delito a solidariedade internacionalista.

Reclamamos a derrogación decontado da Lei Mordaza, a fin da complicidade do Estado español co réxime de apartheid israelí e un embargo total de armas, produtos e relacións comerciais con Israel mentres persista o xenocidio contra o pobo palestino.

A solidariedade non se xulga. Palestina vencerá.

O pasado martes 20 de maio de 2025, a Plataforma SOS Sanidade Pública celebrou unha rolda de prensa diante do Hospital Povisa de Vigo para denunciar a falta de transparencia no novo contrato asinado entre o Servizo Galego de Saúde (Sergas) e o grupo privado Ribera Povisa. O acto contou coa presenza de Meli Vázquez, voceira de Podemos Vigo, e outras reprsentantes de organziacións políticas e sindicais.

Durante a comparecencia, Manuel Moreira, que actuou como Voceiro da PLATAFORMA SOS SANIDADE PÚBLICA, criticou que o acordo, que foi negociado e asinado sen facer públicos os seus termos, malia as reiteradas demandas de información por parte da sociedade civil. Moreira salientou que a Consellería de Sanidade incumpriu o compromiso de facilitar os detalles do contrato antes da súa publicación nos medios de comunicación.

Dende a Plataforma advertimos que a dependencia de aproximadamente 120.000 persoas do sistema sanitario privado, sen alternativas públicas suficientes, condiciona a negociación destes contratos en favor dos intereses empresariais e corporativos. Neste contexto, denunciamos que o deseño arquitectónico e do Plan Funcional e resto da planificación do Novo Hospital de Vigo foron deliberadamente limitados para manter a actividade concertada con Povisa.

Entre as demandas expostas, dende SOS Sanidade Pública esiximos a publicación decontado dos termos do contrato e a elaboración dun Plan de Investimentos para reforzar a atención hospitalaria pública na Área Sanitaria de Vigo. Tamén reclamamos que a Xunta cumpra coas súas obrigas de transparencia e rendición de contas.

A presenza de Meli Vázquez, en representación de Podemos Vigo, evidenciou o apoio político ás reivindicacións da Plataforma SOS SANIDADE PÚBLICA, reforzando a crítica á xestión sanitaria da Xunta e á súa política de concertos con entidades privadas.

Esta rolda de prensa, enmárcase nunha serie de actividades de denuncia coas que procuramos visibilizar as preocupacións cidadás pola progresiva privatización da sanidade pública en Galicia e a falta de transparencia nas decisións que afectan a miles de usuarios do sistema sanitario galego.

Crónica da participación de Podemos Vigo no Día das Letras Galegas 2025 en Compostela

O pasado 17 de maio de 2025, con motivo do Día das Letras Galegas, un grupo de militantes de Podemos Vigo desprazouse até Compostela para participar activamente na manifestación convocada pola plataforma QUEREMOS GALEGO, que este ano puxo o foco na defensa e promoción da nosa lingua como piar fundamental da cultura, da identidade e da soberanía popular galega.

Nun ambiente festivo mais combativo, a militancia viguesa de Podemos Galicia sumouse á marcha cunha presenza visíbel e orgullosa que reclamou unha Galicia plenamente galegofalante, con dereitos lingüísticos garantidos e políticas públicas decididas a prol da normalización. Ao longo do percorrido polas rúas compostelás, as militantes de Podemos Vigo entoaron consignas a favor da lingua, da educación pública en galego e dun modelo de país que recoñeza e respecte a diversidade cultural e lingüística desde unha perspectiva democrática e popular.

A participación nesta mobilización enmárcase no compromiso continuo de Podemos Vigo coa defensa do galego, entendéndoo como ferramenta de cohesión social, de igualdade e de transformación política. 

Dende Compostela, voltamos con forza renovada para seguir tecendo alianzas e impulsando iniciativas que coloquen a lingua galega no centro das políticas públicas, coa convicción de que sen galego non hai futuro para Galicia.

🟣 Podemos Vigo chama á mobilización polo galego este 17 de maio en Compostela

Este sábado, 17 de maio, Día das Letras Galegas, a plataforma cidadá Queremos Galego convoca unha gran manifestación en Santiago de Compostela baixo o lema “Un idioma galego vivo é a mellor garantía dunha Galiza viva”. A marcha partirá ás 12:00 h da Alameda e culminará cunha foliada na Praza do Obradoiro, celebrando a nosa lingua e cultura.

Este ano conmemórase o 20º aniversario da aprobación do Plan Xeral de Normalización Lingüística, un documento que recolle máis de 400 medidas para garantir o uso e a presenza do galego en todos os ámbitos. Porén, a maioría destas accións seguen sen aplicarse, mentres o noso idioma continúa a perder falantes e espazos de uso. 

Desde Podemos Vigo, facemos un chamamento á nosa militancia, simpatizantes e ao conxunto da cidadanía galega a participar activamente nesta mobilización. A defensa do galego é unha loita pola xustiza lingüística, pola igualdade de dereitos e pola dignidade dun pobo que quere vivir na súa lingua.

A manifestación será tamén unha celebración da tradición oral e musical galega, co protagonismo das cantareiras e pandereteiras, figuras centrais na transmisión da nosa cultura popular. 

Un idioma vivo necesita dunha sociedade mobilizada. Este 17 de maio, enchamos Compostela de voces, pandeiretas e compromiso.

Cita:

📍 Alameda de Santiago de Compostela

🗓️ Sábado, 17 de maio 2025

🕛 12:00 h

77º Aniversario do inicio da Nakba palestina

O pasado 15 de maio de 2025, en Vigo e en moitos outros lugares de Galicia e do conxunto do Estado español, desenvolvéronse manifestacións e concentracións en lembranza da Nakba e en solidariedade co pobo palestino.

En Vigo, a concentración tivo lugar ao pé da Oliveira do Paseo de Alfonso XII, un espazo simbólico de loita e memoria. Alí estivemos unha morea de militantes de Podemos Vigo, acompañando cunha presenza activa e comprometida ás persoas congregadas para denunciar o apartheid, o xenocidio e a ocupación sionista, e para reafirmar o noso apoio incondicional á causa palestina e ao dereito do seu pobo a vivir libre na súa terra.

Neste 77º aniversario da Nakba, a limpeza étnica iniciada en 1948 continúa hoxe baixo novas formas de violencia, colonización e exterminio, como estamos a ver traxicamente en Gaza e Cisxordania. Fronte ao silencio cómplice das institucións europeas e a impunidade do réxime israelí, é máis necesario ca nunca que desde Galicia e desde todos os recantos do Estado español sigamos mobilizándonos, esixindo o fin do xenocidio, o embargo de armas a Israel, a ruptura de relacións diplomáticas e económicas co apartheid e o recoñecemento pleno do Estado palestino. Desde Podemos Vigo comprometémonos a seguir sendo parte activa desta loita internacionalista e anticolonial, da man dos movementos sociais, da comunidade palestina e de todas aquelas persoas que non calan ante a barbarie.

🟣 Reunión do Círculo de Podemos Vigo 🟣

📍 Local de Podemos Vigo – Rúa Celso Emilio Ferreiro, 9

📅 O pasado martes 13 de maio 

Na última reunión do Círculo de Podemos Vigo, celebrada no noso local da rúa Celso Emilio Ferreiro, 9  compartimos análises, propostas e debates fundamentais para seguir fortalecendo a nosa organización desde abaixo e co protagonismo das inscritas.

Foi un encontro participativo, plural e moi produtivo. Agradecemos a todas as compañeiras e compañeiros que asistiron e contribuíron co seu compromiso e ilusión.

⚠️ Seguimos traballando por un Vigo máis xusto, feminista, ecolóxico e solidario. Se queres sumar, achegarte ou propoñer, as portas do Círculo están sempre abertas todos os martes ás 18:00 horas.

📣 Si se pode!

#PodemosVigo #CírculoVigo #OrganizaciónPopular #ConstruíndoAlternativas #GalizaRebelde

A militancia de Podemos Vigo mobilízase o 1º de Maio pola xustiza social, o desarme e a paz

Este 1º de Maio, Día Internacional das Traballadoras, a militancia de Podemos Vigo participou activamente na manifestación convocada polas diferentes centrais sindicais da nosa cidade. A presenza de compañeiras e compañeiros de Podemos, acompañando a loita do movemento obreiro, reafirma o noso compromiso coa defensa dos dereitos laborais, sociais e democráticos nun contexto de crecente desigualdade, precariedade e guerra.

Nun mundo atravesado por múltiples crises —económica, ecolóxica, social, bélica…—, cada Primeiro de Maio debe ser un momento de dignidade contra o sistema que destrúe vidas e territorios para enriquecer a unha minoría. Por iso, este ano 2025, ademais da participación na marcha, lanzamos mensaxes e berros  en defensa do desarme e da paz, sumándonos á campaña contra o incremento do gasto militar, a militarización da Unión Europea e o papel cómplice do complexo industrial armamentístico.

Queremos un futuro de traballo digno, non de guerra. Mentres recortan nos servizos públicos, destinan milleiros de millóns de euros a armas, exércitos e intervencións bélicas ao servizo de intereses xeoestratéxicos alleos aos pobos. Denunciamos a hipocrisía dos gobernos que falan de paz mentres alimentan conflitos e normalizan o militarismo como única resposta aos desafíos internacionais.

Desde Podemos Vigo reivindicamos:

• A redución radical do gasto militar e o investimento deses recursos en sanidade, educación, coidados, vivenda e transición ecolóxica.
• A saída de España da OTAN e o impulso dunha política exterior baseada na neutralidade activa, a solidariedade internacionalista e a resolución pacífica dos conflitos.
• O cesamento inmediato do xenocidio en Palestina e o fin da complicidade da Unión Europea e o goberno español co réxime de apartheid israelí.
• A construción dunha Europa dos pobos e da paz, fronte á Europa fortaleza e militarizada que impoñen os lobbies da guerra.

A nosa participación no 1º de Maio é parte dun traballo máis amplo. Estamos a artellar espazos de encontro entre organizacións sociais, pacifistas, sindicais e políticas para poñer no centro do debate público a urxencia dun cambio radical de rumbo. Fronte ao fanatismo armamentista e a lóxica da destrucción, cómpre erguer unha alternativa feminista, ecoloxista, antirracista e antimilitarista. 

Agradecemos a todas as persoas que vos achegastes á manifestación.

Porque sen desarme non hai futuro.

Porque o poder está na xente organizada.

🔴 Podemos Vigo na rúa pola IIIª República 🟣

O pasado 14 de abril de 2025, conmemoramos o aniversario da proclamación da IIª República, e a militancia de Podemos Vigo participou activamente na manifestación republicana convocada na cidade, sumando voces e pasos a unha mobilización plural e comprometida coa memoria democrática, a xustiza social e o dereito dos pobos a decidir libremente o seu futuro.

🚩 A nosa presenza non foi só testemuñal, pois levamos bandeiras e sobre todo conviccións. Porque para Podemos a República non é só unha forma de Estado, senón un proxecto colectivo de dignidade, igualdade e liberdade, fronte a un réxime monárquico herdado do franquismo e blindado polos poderes económicos e mediáticos.

🟪 Defendemos unha República plurinacional, feminista, ecolóxica e popular, que poña no centro os dereitos da xente e a participación democrática. E seguiremos facéndoo, na rúa e nas institucións, canda todas as organizacións e persoas que loitan por un país máis xusto.

💜 Grazas ás compañeiras e compañeiros que representaron a Podemos Vigo nesta xornada de loita e memoria. O futuro será republicano… ou non será!

#14deAbril #República #PodemosVigo #MemoriaDemocrática #ProcesoConstituínte #GalizaRepublicana

Estamos ás portas da Quinta Asemblea Cidadá Estatal, un momento fundamental para o futuro de Podemos. Por iso, este sábado 15 de marzo de 2025 ás 12:30 h, convidámosvos a un encontro aberto á militancia no local de Podemos A Coruña, onde contaremos coa presenza de Julio Rodríguez. Será unha oportunidade para debater, compartir ideas e construirmos xuntas o camiño a seguir. Agardámosvos!

COMPARTE 🔄

BK: https://bsky.app/profile/podemosgalicia.bsky.social/post/3lk3yawtji22c

FB: https://www.facebook.com/share/p/1FiPfFqt5Y/

IG: https://www.instagram.com/p/DHDsiIMI5vO/?igsh=aHd2cjB1Mm9jMnh0

X: https://x.com/Podemos_Galicia/status/1899419070828532171?t=GlVBL6OAVRLy4PLJHDOFvg&s=19

A intensa chuvia que caeu na tardiña deste sábado 8 de marzo de 2025 en Vigo non impediu que milleiros de mulleres feministas saísen ás rúas para reivindicar igualdade e xustiza. A manifestación, convocada por Resposta Feminista, partiu ás 18:30 horas da Praza dos Cabalos baixo o lema “O feminismo muda a historia. Sen loita non hai futuro”.

A marcha avanzou con forza polas rúas da cidade ao ritmo de cánticos e consignas como “Non é a minisaia, non é o pantalón, na mente do machista está a provocación”, “Imos quemar, imos queimar a Conferencia Episcopal por machista e patriarcal” “Non estamos todas, faltan as asasinadas”, “Máis recursos e menos discursos” ou “Por moito que se molle, o feminismo non encolle”. Malia a climatoloxía adversa, a mobilización mantivo un ambiente combativo e reivindicativo até chegar á Porta do Sol, onde culminou a xornada de protesta.

Podemos Vigo participou activamente na manifestación, cunha morea de militantes que sumaron a súa voz á loita feminista. A nosa organización reafirmou o seu compromiso coa loita feminista e coa defensa dos dereitos das mulleres, insistindo na necesidade de políticas públicas que garantan avances reais e efectivos contra a violencia machista e a discriminación de xénero.

No manifesto do 8M, Resposta Feminista salientou que esta data é “un día de loita”, non de celebración, e alertou sobre a persistencia da fenda salarial, a precariedade laboral e a violencia machista. Tamén denunciaron a discriminación das mulleres migrantes e a mercantilización do corpo feminino a través da prostitución e a “opresión estética”. Subliñaron a necesidade de reforzar a coeducación e a educación sexual integral, a saúde mental con perspectiva de xénero e os servizos públicos para as mulleres, fronte á súa privatización. Finalmente, advertiron sobre o avance da ultradereita e reafirmaron que “o feminismo é un dos principais bastións contra a ultradereita, o fascismo e os seus discursos de odio”.